Gaude flore virginali

Gaude flore virginali. 1

Language: Latin

Gaude flore virginali
Honoreque speciali
Transcendens splendiferum
Angelorum principatum
Et sanctorum decoratum
Dignitate numerum.

Gaude sponsa cara Dei,
Nam ut clara lux diei
Solis datur lumine,
Sic tu facis orbem vere
Tuae pacis resplendere
Lucis plenitudine.

Gaude splendens vas virtutum,
Cuius pendens est ad nutum
Tota caeli curia:
Te benignam et felicem
Jesu dignam genitricem
Veneratur in gloria.

Gaude nexu voluntatis
Et amplexu caritatis
Iuncta sic Altissimo,
Ut ad votum consequaris
Quicquid virgo postularis
A Jesu dulcissimo.

Gaude mater miserorum,
Quia Pater saeculorum
Dabit te colentibus
Congruentem hic mercedem
Et felicem poli sedem
Regnis in caelestibus.

Gaude virgo mater Christi
Quia sola meruisti,
O virgo piissima,
Esse tantae dignitatis
Quod sis sanctae Trinitatis
Sessioni proxima.

Gaude virgo mater pura
Certa manens et secura
Quod haec septem gaudia
Non cessabunt nec decrescent
Sed durabunt et florescent
Per aeterna saecula. Amen.

https://translate.google.it/

LAUDETUR   JESUS  CHRISTUS!

LAUDETUR  CUM  MARIA!

SEMPER  LAUDENTUR!

Sia lodato Gesù Maria