CANTA Mariam: 15-21

 

PSALMUS  XV

Conserva me, Domina, quoniam speravi in Te:

mihique Tuae stillicidia Gratiae impartire.

 

Alvus Tuus virginalis et viscera Tua:

Filium Altissimi genuerunt.

 

Benedicta sint ubera Tua:

quibus lacte deifico Salvatorem enutriisti.

 

Confitemini laudes Virgini gloriosae: 

quicumque apud Eam gratiam et misericordiam invenistis.

 

Date magnificentiam nomini Ejus: 

et collaudate in saeculum Conceptum atque Partum Ejus.

Gloria Patri, etc.

 

PSALMUS  XVI

Exaudi, Domina, iustitiam meam et amorem:

amove a me tribulationem meam.

 

Confitebor Tibi in voce exultationis:

cum magnificaveris super me misericordiam Tuam.

 

Imitamini Eam, sanctae Virgines Dei:

ut imitatae sunt Agnes, Barbara, Doròthea et Catharina.

 

Honorificate Eam in voce labiorum vestrorum:

per hoc Eius gratiam Agatha, Lucia, Margarita et

Caecilia susceperunt.

 

Sponsum dabit vobis Patris Filium:

et de Paradisi liliis coronam incomparabiliter radiantem. 

Gloria Patri, etc.

 

PSALMUS   XVII

Diligam Te, Domina coeli et terrae:

et in gentibus nomen Tuum invocabo.

 

Confitemini Illi, tribulati corde:

et roborabit vos contra inimicos vestros.

 

Stilla nobis, Domina, gratiam uberum Tuorum:

ex manante lacte dulcedinis Tuae refice viscera puerorum

tuorum.

 

Religiosi omnes honorate Illam:

quia Ipsa es adjutrix, et vestra specialis advocata.

 

Esto refrigerium nostrum, gloriosa Mater Christi:

quia Tu es totius religionis mirabile firmamentum.

Gloria Patri, etc.

 

PSALMUS   XVIII

Coeli enarrant gloriam Tuam:

et unguentorum Tuorum fragrantia in gentibus est dispersa.

Respirate ad Illam, perditi peccatores:

et perducet vos in indulgentiae portum.

 

In hymnis et psalmis et canticis pulsate viscera Eius:

et stillabit vobis gratiam dulcedinis Suae.

 

Glorificate Eam, iusti, ante thronum Dei:

quia fructu ventris Eius estis iustitiam operati.

 

Laudate Eam, coeli coelorum:

et nomen Eius glorificet omnis terra. 

Gloria Patri, etc.

 

PSALMUS  XIX

Exaudias nos, Domina, in die tribulationis:

et precibus nostris converte clementem faciem Tuam.

 

Ne projicas nos in tempore mortis nostrae:

sed succurre animae, cum deserverit corpus suum.

 

Mitte angelum in occursum eius:

per quem ab hostibus defendantur.

 

Ostende ei serenissimum Iudicem saeculorum:

qui ob Tui gratiam veniam ei largiatur.

 

Sentiat in poenis refrigerium Tuum:

et concede ei locum inter electos Dei. 

Gloria Patri, etc.

 

PSALMUS  XX

Domina, in virtute Tua laetabitur cor nostrum:

et in dulcedine nominis Tui consolabitur anima nostra.

 

De sedibus mitte nobis Sapientiam:

per quam in omni veritate dulciter illustremur.

 

A carnalibus desideriis concede gratiam abstinendi:

ut lumen gratiae in nostris cordibus oriatur.

 

Quam dulcia diligentibus Te eloquia tua, Domina!

quam suavia sunt Tuarum stillicidia gratiarum.

 

Gloriam et honorem psallam Tibi:

et in nomine Tuo gloriabor in saeculum.

Gloria Patri, etc.

 

 

PSALMUS   XXI

Deus, Deus meus:

respiciat in me meritis Tuis, Virgo semper Maria.

 

Domina mea, clamavi ad Te per diem et noctem:

et fecisti cum servo Tuo misericordiam Tuam.

 

Quia ego speravi in misericordia Tua:

sempiternum a me opprobrium abstulisti.

 

Deriserunt me inimici mei undique:

Tu autem sub umbra manus Tuae contulisti mihi

refrigerium bonum.

 

Adorent Te familiae gentium:

et glorificent te omnes ordines angelorum.

Gloria Patri, etc.

 

AMDG et DVM