Dignare me laudare Te, Virgo Sacrata.

  

PSALMUS 1 

                         

Beatus vir qui diligit nomen tuum, Maria Virgo:

*gratia tua animam ejus confortabit.

Tanquam aquarum fontibus irrigatum uber:

*in eo fructum justitiae propagabis.

Benedicta tu inter mulieres:

*per credulitatem cordis sancti tui.

Universas enim foeminas vincis pulchritudine carnis:

*superas angelos et archangelos excellentia sanctitatis.

Misericordia tua et gratia ubique praedicatur:

*Deus operibus manuum tuarum benedixit.

Gloria Patri, etc.

PSALMUS     2

Quare fremuerunt inimici nostri:

*et adversum nos meditati sunt inania?

Protegat nos dextera tua, Mater Dei:

*ut acies terribilis, confundens et destruens eos.

Venite ad eam, qui laboratis et tribulati estis:

*et dabit refrigerium animabus vestris.

Accedite ad eam in tentationibus vestris:

*et stabilitet vos serenitas vultus ejus

Benedicite illam in toto corde vestro:

*misericordia enim illius plena est terra.

Gloria Patri, etc.

PSALMUS 3

Domina, quid multiplicati sunt qui tribulant me?

*in tempestate tua persequeris et dissipabis eos.

Dissolve colligationes impietatis nostrae:

*tolle fasciculos peccatorum nostrorum.

Miserere mei, Domina, et sana infirmitatem meam:

*tolle dolorem et angustiam cordis mei.

Ne tradas me manibus inimicorum meorum:

*et in die mortis meae conforta animam meam.

Deduc me ad portum salutis:

*et spiritum meum redde Factori et Creatori meo.

Gloria Patri, etc.

PSALMUS 4

Cum invocarem exaudisti me, Domina:

*et e sublimi solio tuo, mei dignata es recordari.

A rugientibus praeparatis ad escam:

*et de manibus quaerentium liberabit me gratia tua.

Quoniam benigna est misericordia et pietas tua:

*in omnes, qui invocant nomen sanctum tuum.

Benedicta sis, Domina, in aeternum:

*et majestas tua in saeculum.

Glorificate eam, omnes gentes, in virtute vestra:

*et cuncti populi terrae, extollite magnificentiam ejus.

Gloria Patri, etc.

PSALMUS 5

Verba mea auribus percipe, Domina:

*et ne avertas a me speciositatem vultus tui.

Converte luctum nostrum in gaudium:

*et tribulationem nostram in jubilationem.

Corruant ante pedes nostros inimici nostri:

*virtute tua eorum capita conterantur.

Benedicat te omnis lingua:

*et nomen sanctum tuum confiteatur omnis caro.

Spiritus enim tuus super mel dulcis:

*et haereditas super mel et favum.

Gloria Palri, etc.

AVE MARIA PURISSIMA!
DIO CI BENEDICA 
E LA VERGINE CI PROTEGGA!