Canta Mariam ! - SALMI 133/139

PSALMUS 133.

Ecce nunc benedicite Dominam:

omnes qui speratis in nomine sancto Eius.

 

Gaudete gaudio magno, qui exaltatis et glorificatis Eam:

quia laetabimini ab ubertate consolationis Eius.

 

Ecce nunc inundante ubertate declinabit in vos:

ad consolandum et laetificandum corda vestra.

 

Benedicite Illam, omnes servi ejus:

et memoriale sit in desiderio animae vestrae.

 

Benedicite Illam, omnes angeli et sancti Dei:

laudate in saecula mirabilia Ejus. 

Gloria Patri, etc.

 

PSALMUS 134.

Laudate nomen Domini:

benedicite nomen Mariae matris eius.

 

Mariae precamina frequentate:

et suscitabit vobis voluptates sempiternas.

 

In animo contrito veniamus ad Illam:

et non stimulabit nos cupiditas peccati.

 

Qui cogitat de Illa in tranquillitate mentis:

inveniet dulcorem et requiem pacis.

 

Respiremus ad Illam in finitione nostra:

et reserabit nobis atria triumphantium.

Gloria Patri, etc.

 

PSALMUS 135.

Confitemini Domino, quoniam bonus est:

quoniam per Suam dulcissimam matrem Virginem Mariam 

datur misericordia eius.

 

Impetra nobis, Domina, amicitiam Iesu Christi :

et custodi nos, ne perdamus innocentiam nostram.

 

Còmprime hostem nostrum imperio Tuo:

ne feriat  in nobis virtutem charitatis.

 

Bona naturalia conserva in nobis:

et bona gratiae per Te multiplicentur.

 

Illumina vias et semitas nostras:

ut noscamus quae beneplacita sunt Deo.

Gloria Patri, etc.

 

PSALMUS 136.

Super flumina Babylonis fleverunt Hebraei:

nos vero super iniquitates nostras lugeamus.

 

Clamemus humiles ad puerperam Virginem:

offeramus Ei planctus et suspiria nostra.

 

Non invenitur propitiatio sine Illa:

nec salus sine fructu Illius.

 

Per Illam peccata purgantur:

et per fructum Illius, animae dealbantur.

 

Per Illam fit satisfactio peccatis:

per fructum Illius, sanitas condonatur. 

Gloria Patri, etc.

 

PSALMUS 137.

Confitebor Tibi, Domina, in toto corde meo:

quia per Te expertus sum clementiam Iesu Christi.

 

Audi, Domina, verba mea et preces meas:

et in conspectu angelorum cantabo Tibi laudes.

 

In quacumque die invocavero Te, exaudi me:

et multiplica virtutem in anima mea.

 

Confiteantur Tibi omnes tribus et linguae:

quia per Te salus restituta est nobis.

 

Ab omni perturbatione libera servos Tuos:

et fac eos vivere sub pace et protectione Tua.

Gloria Patri, etc.

 

PSALMUS 138.

Domina, probasti me, et cognovisti me:

ruinam et transgressionem meam.

 

Copiosa facta est super me misericordia Tua:

et dilatata est super me clementia.

 

Imperfectum meum aspexit oculus Tuus:

et palpebrae Tuae noverunt vias meas.

 

Affluentiam desiderii sancti habeamus a Spiritu Sancto:

et macula peccati non turbet conscientiam nostram.

 

Serenet corda nostra lux misericordiae Tuae:

et recreet nos Tuae pacis dulcedo. 

Gloria Patri, etc.

 

PSALMUS 139.

Eripe me, Domina, ab omni malo:

et ab hoste infernali defende me.

 

Contra me tetendit arcum suum:

et in fraude sua insidiatur mihi.

 

Constringe vires eius malignas:

et obtunde potenter astutias eius.

 

Converte iniquitatem ipsius in verticem illius:

et in foveam quam fecit, cadat festinanter.

 

Nos autem exultemus in servitio Tuo:

et in Tuis laudibus gloriemur. 

Gloria Patri, etc.