AVE MARIA!
Floréte, flores, quasi lílium, et date odórem, et frondéte in grátiam, collaudáte cánticum, et benedícite Dóminum in opéribus suis.
Eccli 39,19
In me grátia omnis viæ et veritátis, in me omnis spes vitæ et virtútis: ego quasi rosa plantáta super rivos aquárum fructificávi.
Eccli 24,25; Eccli 39,17
Hymnus instar illius,
qui ascribitur Ambrosio et Augustino.
<< Te Matrem Dei laudamus : te Mariam Virginem profitemur.
Te Æterni Patris Sponsam : omnis terra
veneratur.
Tibi
omnes Angeli et Archangeli : tibi Throni et Principatus fideliter
deserviunt.
Tibi
omnes Potestates et omnes Virtutes Cælorum : et universæ Dominationes obediunt.
Tibi
omnes chori, tibi Cherubim et Seraphim exultantes assistunt.
Tibi omnis angelica creatura : incessabili voce proclamat.
Sancta, Sancta, Sancta : Maria Dei Genitrix,
Mater et Virgo.
Pleni sunt cœli et terra : majestatis
gloriæ fructus ventris tui.
Te gloriosus Apostolorum chorus : sui
Créatoris Matrem collaudat.
Te
Beatorum Martyrum cœtus candidatus : Christi Genitricem glorificat.
Te gloriosus
Confessorum exercitus : Trinitatis templum appellat.
Te
Sanctarum Virginum chorea amabilis : virginitatis, et humilitatis exemplum
prædicat.
Te
tota cœlestis curia : Reginam honorat.
Te per universum orbem : Ecclesia invocando
concelebrat.
Matrem :
Divinæ Majestatis.
Venerandam
te veram Regis cœlestis puerperam : sanctam quoque, dulcem, et piam.
Tu Angelorum Domina : tu Paradisi janua.
Tu scala Regni cœlestis : et gloriæ.
Tu thalamus : tu arca pietatis et gratiæ.
Tu vena misericordiæ : tu Sponsa et Mater
Regis æterni.
Tu templum et sacrarium Spiritus Sancti :
totius beatissimæ Trinitatis nobile triclinium.
Tu Mediatrix Dei, et hominum amatrix :
mortalium cœlestis illuminatrix.
Tu agonizatrix pugnantium, advocata
pauperum : miseratrix et refugium peccatorum.
Tu erogatrix munerum : separatrix ac terror
dæmonum et superborum.
Tu mundi Domina, cœli Regina : post Deum
sola spes nostra.
Tu salus te invocantium, portus naufragantium
: miserorum solatium, pereuntium refugium.
Tu Mater omnium beatorum, gaudium plenum
post Deum : omnium supernorum civium
solatium.
Tu promotrix justorum, congregatrix
errantium : promissio Patriarcharum.
Tu veritas Prophetarum, præconium et doctrix
Apostolorum : magistra Evangelistarum.
Tu fortitudo Martyrum, exemplar Confessorum
: honor et festivitas Virginum.
Tu, ad liberandum exulem hominem : Filium
Dei suscepisti in uterum.
Per te, expugnato hoste antiquo, sunt aperta fidelibus regna cœlorum.
Tu cum Filio tuo sedes : ad dexteram Patris.
Tu ipsum pro nobis roga, Virgo Maria : quem
nos ad judicandum credimus esse venturum.
Te ergo poscimus, nobis tuis famulis subveni
: qui pretioso sanguine Filii tui redempti sumus.
Æterna fac, pia Virgo, cum Sanctis tuis : nos
gloria numerari.
Salvum fac populum tuum, Domina : ut simus
participes hæreditatis Filii tui.
Et rege n0s : et custodi nos in æternum.
Per singulos dies : o pia, te salutamus.
Et laudare te cupimus usque in æternum : mente, et voce.
Dignare, dulcis Maria, nunc, et semper : nos
sine delicto conservare.
Miserere, pia, nobis : miserere nobis.
Fiat misericordia tua magna nobiscum : quia
in te, Virgo Maria, confidimus.
In te, dulcis Maria, speramus : nos defendas
in æternum.
Te decet laus, te decet imperium : tibi virtus
et gloria in sæcula sæculorum. Amen. >>
Symbolum instar illius Athanasii.
<< Quicumque vult salvus esse, ante omnia opus est : ut
teneat de Maria firmam fidem.
Quam nisi quisque integram inviolatamque servaverit : absque dubio in æternum peribit.
Quoniam ipsa sola virgo manens peperit : sola cunctas haereses
interemit.
Confundatur et erubescat Hebræus : qui dicit
Christum de Joseph semine esse natum.
Confundatur Manichæus : qui dicit Christum fictum habere corpus.
Palleat omnis : qui hoc ipsum aliunde, non de Maria dicit assumpsisse.
Idem namque Filius, qui est Patris in divinis unigenitus : et verus
unigenitus Virginis Mariæ filius.
In coelis sine matre : in terris
sine patre.
Nam sicut anima rationalis et caro propter unionem de homine vere nascitur
: ita Deus et homo Christus de Maria Virgine vere
generatur.
Induens carnem de carne Virginis : quia sic genus humanum redimi congruebat.
Qui secundum divinitatem æqualis Patri : secundum vero
humanitatem minor Patre.
Conceptus in utero Virginis Mariæ, Angelo annuntiante, de Spiritu sancto : non tamen Spiritus sanctus
est pater ejus.
Genitus in mundum sine poena carnis Virginis
Matris : quia sine delectatione carnis conceptus.
Quem lactavit
Mater : ubere de coelo pleno.
Quem circumstant
Angeli obstetricum vice : nuntiantes pastoribus gaudium magnum.
Hic a Magis
muneribus adoratus, ab Herode in Ægyptum fugatus, a Joanne in Jordane baptizatus : traditus, captus,
flagellatus, crucifixus, mortuus et sepultus.
Cum gloria
resurrexit : ad coelos ascendit.
Spiritum Sanctum in discipulos : et in Matrem misit.
Quam demum ipse
in coelum assumpsit : et sedet ad dexteram Filii, non cessans pro nobis Filium
exorare.
Hæc est fides de Maria Virgine : quam nisi quisque fideliter firmiterque
crediderit, salvus esse non poterit.>>
AMDG et BVM
