Salterio Mariano...

3

<< Maria... Nostra Signora di Guadalupe

schiaccia la testa a satana e salva il tuo Popolo.

Maria... Nostra Signora di Guadalupe

raduna i tuoi figli sotto il tuo Manto di stelle >>

CI

Domina, exaudi orationem meam:

et clamor meus ad te veniat.

Non avertas sacrum aspectum tuum a me:

neque abomìneris me propter immunditiam meam.

Non derelinquas me in cogitatu et consilio inimicorum meorum:

et ne sinas me càdere in exprobrationem illorum pessimam.

Qui confidunt in te, non timebunt còlubrum tortuosum:

et qui exaltant te praeconiis, evadunt manus Acherontis.

Per virginalem conceptum tuum da mihi in te confidentiam bonam:

et per admirabilem partum tuum laetifica animam meam.

Gloria Patri, etc.

CII

Benedic, anima mea, Matri Iesu Christi:

et omnia praecordia mea, glorificate nomen eius.

Ne obliviscaris beneficia eius:

nec gratiam et consolatus illius.

Gratia eius peccata relaxantur:

et misericordia eius aegritudines reparantur.

Benedicite ei, omnes virtutes coelorum:

glorificate eam, chori Apostolorum et Prophetarum.

Benedicite, mare et insulae gentium:

hymnum dicite ei, coeli et habitatores eorum.

Gloria Patri, etc.

CIII

Benedic, anima mea, Virgini Mariae:

honor et magnificentia eius in perpetuum.

Formositatem et pulchritudinem induisti:

amicta es, Domina, fulgenti vestimento.

De te procedit peccatorum medela:

et pacis disciplina, ac fervor charitatis.

Imple nos servos tuos virtutibus sanctis:

et ira Dei non appropinquet nobis.

Iucunditatem aeternam da servitoribus tuis:

et noli eos oblivisci in certamine mortis.

Gloria Patri, etc.

CIV

Confitemini Dominae nostrae, et invocate nomen eius:

cantate ei gloriose, narrantes virtutes eius.

Laudate et exaltate eam, Virgines filiae Sion:

quia desponsabit vobis Regem angelorum.

Honorate Reginam plenam omni gratia:

et contemplamini cum reverentia sanctissimum vultum eius.

Salus sempiterna in manu tua, Domina:

qui te digne honorificaverint, suscipient illam.

Clementia tua non deficiet a saeculis aeternis:

et misericordia tua a generatione in generationem.

Gloria Patri, etc.

CV

Confitemini Dominae nostrae, quoniam bonum est:

per cunctas tribus terrae enarrate misericordias eius.

Longe est ab impiis conversatio eius:

a via Altissimi non declinavit pes ejus.

Fons irrigantis gratiae procedit de ore illius:

et emanatio virginalis sanctificans animas castas.

Spes de gloria paradisi in corde illius:

quae devoto animo honorificaverit illam.

Miserere nostri, fulgentissima Regina coeli:

et praesta consolationem de gloria tua.

Gloria Patri, etc.

CVI

Confitemini Domino, quoniam bonum:

confitemini Matri eius, quoniam in saeculum misericordia eius.

Innocentiam et viam prudentiae ostende nobis, Domina:

et viam intelligentiae indica servis tuis.

Timor Dei illustrat inellectum:

et amor tuum exhilarat illum.

Beatus vir, cuius eloquium est tibi gratum:

illius ossa impinguabuntur adipe et pinguedine.

Eloquium tuum sustentat animam imbecillem:

et labia tua esurentiem animum refocillant.

Gloria Patri, etc.

CVII

Paratum cor meum, Domina, paratum cor meum:

laudes tibi psallere et cantare.

Maior est charitas tua cunctis divitiis:

et gratia tua super aurum et lapidem pretiosum.

Beatitudo et iustitia donantur a Deo:

qui antem de peccatis conversi fuerint ad te, poenitentiae

remedium consequentur.

Emissionis tuae gratia et pax:

qui autem tibi placuerit, procul fiet a perditione.

Esto umbraculum protectionis in tentationibus nostris:

expansio alarum tuarum defendat nos a devorante.

Gloria Patri, etc.

CVIII

Domina, laudem meam ne despèxeris:

et hoc dedicatum tibi psalterium digneris acceptare.

Respice voluntatem cordis mei:

et affectionem meam fac tibi beneplacentem.

Propera ad visitandum servos tuos:

sub tegumento manus tuae illaesi conserventur.

Illuminationem Spiritus sancti per te suscipiant:

et refrigerium contra cupiditatis aestum.

Medere contritis corde, Domina:

et refove eos unguento pietatis. Gloria Patri, etc.

CIX

Dixit Dominus Dominae nostrae:

Sede, Mater mea, a dextris meis.

Bonitas et sanctitas placuerunt tibi:

ideo regnabis mecum in aeternum.

Corona immortalitatis in capite sancto tuo:

cuius fulgor et claritas non extinguetur.

Miserere nostri, Domina, mater luminis et splendoris:

illumina nos, Domina veritatis et virtutis.

De thesauris tuis infunde nobis sapientiam Dei:

et intellectum prudentiae, ac formam disciplinae.

Gloria Patri, etc.

CX

Confitebor tibi, Domina, in toto animo meo:

glorificabo te in tota mente mea.

Opera gratiae tuae commorabuntur:

et testamentum misericordiae tuae ante thronum Dei.

Per te missa est redemptio a Deo:

populus poenitens habebit spem salutis.

Intellectus bonus omnibus honorantibus te:

et sors illorum inter angelos pacis.

Gloriosum et admirabile est nomen tuum:

qui illud retinent, non expavascent in puncto mortis.

Gloria Patri, etc.

CXI

Beatus vir, qui timet Dominam:

et beatum cor, quod diligit illam.

Iucundus homo, qui non satiatur laude tua:

et a relatu virtutum tuarum non fatigatur.

Exortum est in corde illius lumen Dei:

Spiritus sanctus illuminat intelligentiam ejus.

Disperge, Domina, gratiam tuam pauperibus tuis:

esurientes refove, et egenos.

In memoria aeterna fiunt per te nomina:

auditu terribili non trepidet cor nostrum.

Gloria Patri, etc.

CXII

Laudate, pueri, Matrem Dei:

glorificate, senes, nomen eius.

Benedicta sit Maria Mater Christi:

ipsa enim est via ad patriam sanctitatis.

Excelsus super Cherubim thronus eius:

et sedes ejus super cardines coeli.

Super humiles vultum ejus:

et super confidentes in eam aspectus illius.

Misericordia ejus super omnem carnem:

et eleemosyna illius usque ad extremum terrae.

Gloria Patri, etc.

CXIII

In exitu animae meae de hoc mundo:

occurre illi, Domina, et suscipe eam.

Consolare eam vultu sancto tuo:

aspectus daemonis non turbet illam.

Esto illi scala ad regnum coelorum:

et iter rectum ad paradisum Dei.

Impetra ei a Patre indulgentiam pacis:

et sedem lucis inter servos Dei.

Sustine devotos ante tribunal Christi:

suscipe causam eorum in manibus tuis.

Gloria Patri, etc.

CXIV

Dilexi Matrem Dei Domini mei:

et lux miserationum eius infulsit mihi.

Circumdederunt me dolores mortis:

et visitatio Mariae laetificavit me.

Dolorem et periculum incurri:

et recreatus sum gratia illius.

Nomen eius et memoriale illius sit in medio cordis nostri:

et non nocebit nobis ictus malignantis.

Convertere, anima mea, in laudem ipsius :

et invenies refrigerium in novissimis tuis.

Gloria Patri, etc.

CXV

Credidi, propter quod locutus sum:

gloriam tuam, Domina, orbi terrae.

Compatere animae meae, et dirige illam:

dignare beneplacitum tuum insinuare illi.

Statue illi testamentum pacis et dilectionis tuae:

praebe illi ingenui memoriam nominis tui.

De benedictione ventris tui da mihi sustentationem:

et de pinguedine gratiae tuae dulcòra animam meam.

Disrumpe vincula peccatorum meorum:

et de virtutibus exorna faciem animae meae.

Gloria Patri, etc.

CXVI

Laudate Dominam nostram, omnes gentes:

glorificate eam omnes populi.

Quoniam confirmata est super nos gratia et misericordia ejus:

et veritas illius pérmanet in aeternum.

Qui digne coluerit illam, iustificabitur:

qui autem neglexerit illam, morietur in peccatis suis.

Labia angelorum enarrabunt sapientiam ejus:

et omnes cives paradisi cantabunt ejus laudem.

Bono animo accedentes ad illam:

non capientur ab angelo devastante. Gloria Patri, etc.

CXVII

Confitemini Domino, quoniam bonus:

confitemini Matri eius, quoniam in saeculum misericordia eius.

Amor illius expellit peccatum a corde:

et gratia illius éxpiat conscientiam peccatoris.

Via veniendi ad Christum est appropinquare ad illam:

qui autem fugerit eam, non inveniet viam pacis.

Qui obduratus est in peccatis, saepe invocet illam:

et lux in suis tenebris orietur.

Qui tristatur in corde suo, clamet ad illam:

et dulcoranti stillicidio inebriabitur. Gloria Patri, etc.

CXVII

Beati immaculati in via:

qui Matrem Domini imitantur.

Beati imitatores humilitatis ejus:

beati participes charitatis illius.

Beati perscrutatores virtutum illius:

beati conformes imagini illius.

Beati qui conceptum et partum illius venerantur:

beati qui devote ei famulantur.

Beati, qui in ea habent spem et confidentiam:

beati qui per illam suscipient felicitatem sempiternam.

Gloria Patri, etc.

(A)

Retribue servo tuo, Domina:

vivifica me, et faciam voluntatem tuam.

Incola ego sum in terra:

nihil abscondas mihi de amore tuo.

Concupivit anima mea laudem tuam desiderare:

omni tempore.

Tu enim salus mea in Domino:

quae me morti adjudicatum liberasti.

Quid pro his retribuam tibi, nisi me totum?

Domina, suscipe me. Gloria Patri, etc..

(B)

Legem pone mihi, Domina, voluntatis tuae sanctarum sanctissima: et exquiram eam semper.

Deduc me in semitam miserationum tuarum, mulierum pulcherrima: quia ipsam volui.

Inclina animam meam ad supernorum amorem, Domina:

et non ad impudicitiam.

Ecce concupivi castimoniam tuam a juventute mea:

in misericordia tua confirma me.

Et observabo viam testimoniorum tuorum in saeculum:

et scrutabor mandata Filii tui, quae dilexi.

Gloria Patri, etc.

(C)

Memor esto verbi tui, dominarum Primiceria:

in quo mihi spem dedisti.

Haec in tempestatum fluctibus potenter tenuit me:

quia eloquium tuum vivificabit me.

Circumdederunt me viri mendaces, et congregata sunt

super me flagella: et ecce manus tua eripuit me.

Communicavi in bonis omnibus timentibus te:

et custodientibus obnixe mandata tua.

Miserationibus tuis plena est terra:

ideo viam iustificationum tuarum exquisivi.

Gloria Patri, etc.

(D)

Bonitatem fecisti cum servo tuo, Domina:

de qua gaudent angeli.

Disciplinam morum tuorum et aequitatem tuam doce me: 

quia verbis tuis prae cunctis credidi.

Bonum mihi, quia onere tuo humiliasti me:

ut sequar conversationem tuam.

Qui amant servientes tibi, venerabuntur:

qui autem abominatus fuerit eos, ruet in aeternum.

Veniant mihi semper desuper guttae clementiae

tuae, et vivam:

quia lex tua sancta meditatio mea est.

Gloria Patri, etc.

(E)

Defecit in semitis tuis anima mea, Domina:

et nisi miseratio maxima esset, periissem utique in infirmitate mea.

Defecerunt oculi mei in contemplatione tua:

velut uter in pruina a te visa est anima mea.

Secundum bonitatem tuam vivìfica me:

et non obliviscar sermones tuos, quia tibi adhaerere bonum est.

Dispositione tua persevérat mundus:

quem et tu cum Deo fundasti ab initio.

Tuus totus ego sum, Domina, salvum me fac:

quoniam desiderabiles erant laudes tuae in tempore peregrinationis meae. Gloria Patri, etc.

(F)

Quomodo dilexi legem tuam, Domina:

in conspectu meo semper.

Suavitatum tuarum affluentia cor meum alienavit a me:

et caro mea mirabiliter exultavit in te.

Quam dulcia peccatoribus eloquia tua, Domina!

Super omnem melodiam refectio tua dulcis ori meo.

Illuminatio gressibus meis verbum tuum:

et lumen ineffabile semitis meis.

Quoties exasperaverunt me peccatores inferni, quia a charitate tua declinare nolui! 

ego autem speravi in te, Domina. Gloria Patri, etc.

(G)

Iniquos odio habui:

et viam tuam dilexi, Domina gratiosa.

Adiuva me, et salvus ero, Domina mundi:

et meditabor honorificentiam mandatorum tuorum.

Fac me semper stare in timore tuo:

et non tradas me, Virgo, calumniantibus me.

Vernaculus tuus sum ego:

minimus in familia tua.

Custodi me, Domina:

a negligentibus judicia justitiae tuae.

Contemnes omnes discedentes a servitio tuo:

quia injusta est conversatio eorum. Gloria Patri, etc.

(H)

Mirabilia tua testimonia, Mater alma:

et sermonibus tuis illuminatum est cor meum.

Vultum tuum deprecabuntur omnes divites plebis:

filiae regum collaudant faciem tuam.

Ardens verbum labiorum tuorum vehementer:

qui ad te properat, percipiat illud.

Arundo agitata sum in conspectu tuo:

tene me, Domina, sub jugo tuo, et non confundar.

Servientes tibi plus aliis invadunt dracones inferni:

sed tu, Domina, defende nos. Gloria Patri, etc.

(I)

Clamavi in toto corde meo ad te, Domina:

de necessitatibus meis clementer eripe me.

Vocem gemitus mei exaudi, Domina mea:

doce me, quid acceptum sit apud te omni tempore.

Longe a nescientibus te salus:

qui autem perstat in obsequio tuo, procul fiat a perditione.

Misericordia tua rigat universum:

Domina, in salutari tuo vivifica me.

Initium eloquiorum tuorum veritas in aeternum:

et legem tuam immaculatam non sum oblitus.

Gloria Patri, etc.

(J)

Principes persecuti sunt me gratis:

et ab invocatione nominis tui trépidat spiritus malignus.

Pax multa observantibus nomen tuum, Mater Dei:

et non est illis scandalum.

Septénis horis decantavi tibi laudes, Domina:

iuxta eloquium tuum da mihi intellectum.

Intret oratio mea in conspectu tuo, ut non derelinquam

te, Domina, cunctis diebus vitae meae:

quoniam viae tuae misericordia et veritas.

Concupiscam in aeternum laudare te, Domina:

cum docueris me justificationes tuas. Gloria Patri, etc.

CXIX

Ad Dominam, cum tribularer, clamavi:

et exaudivit me.

Domina, libera nos ab omni malo:

cunctis diebus vitae nostrae.

Contere caput inimicorum nostrorum:

pede insuperabilis virtutis tuae.

Ut exultavit spiritus tuus in Deo salutari tuo:

sic veram digneris infundere laetitiam cordi meo.

Ad Dominum accede rogatura pro nobis:

ut per te nostra peccata deleantur. Gloria Patri, etc.

CXX

Levavi oculos meos ad te, Mater Christi:

per quam venit solatium omni carni.

Auxillium tuum et gratiam tuam nobis impende:

in omni tribulatione nostra.

Custodi nos, Domina Virgo Maria:

ne peccatorum laqueo capiamur.

Non dormit neque dormiet pupilla oculi tui:

ut tua semper custodia protegamur.

Angelorum et hominum te laudat omnis lingua:

et ante te omnia genua curvantur. Gloria Patri, etc.

CXXI

Laetatus sum in te, Regina coeli:

quia te duce in domum Domini ibimus.

Hierusalem coelestis civitas:

ad Mariae praemia veniamus.

Pacem et indulgentiam, Virgo, nobis impétra:

et palmam de hostibus, et triumphum.

Conforta, et consolare cor nostrum:

tuae dulcedine pietatis.

Sic, Domina, nobis infunde clementiam:

ut devote in Domino moriamur. Gloria Patri, etc.

CXXII

Ad te levavi oculos meos, Regina:

quae regnas in coelis.

Adiutorium nostrum in virtute sit nominis tui:

per te omnia opera nostra dirigantur.

Benedicta sis in coelo et in terra:

in mari et in omnibus abyssis.

Benedicta sit foecunditas tua:

benedicta sit virginitas, et munditia tua.

Benedictum sit corpus tuum sanctum:

benedicta sit anima tua sanctissima. Gloria Patri, etc.

CXXIII

Nisi quia Domina nostra erat in nobis:

invenissent nos pericula multa.

Esto, Virgo, defensatrix nostra:

et ante Deum advocata propitia.

Ostende nobis, Domina, misericordiam tuam:

et conforta nos in servitio sancto tuo.

Benedicant te sancti angeli in coelo:

benedicant te omnes homines super terram.

Non tradas bestiis animas confitentium tibi:

ora te canentium non obturentur. Gloria Patri, etc.

CXXIV

Qui confidunt in te, Mater Dei:

non timebunt a facie inimici.

Gaudete et exultate, omnes qui diligitis eam:

quia adiuvabit vos in die tribulationis vestrae.

Reminiscere miserationum tuarum, Domina:

et releva peregrinationem incolatus nostri.

Converte amabilem vultum tuum super nos:

confunde et destrue omnes inimicos nostros.

Benedicta sint omnia opera manuum tuarum, Domina:

benedicta sint omnia sancta miracula tua.

Gloria Patri, etc. 

CXXV

In convertendo faciem tuam serenissimam super nos:

laetificabis nos, virginea Mater Dei.

Benedicta sis, o sacrarium Christi:

prae cunctis mulieribus super terram.

Benedictum sit gloriosum nomen tuum:

quod os Domini mirabiliter nominavit.

Non deficiat laus tua de labiis nostris:

nec charitas tua de praecordiis nostris.

Qui te diligunt, benedicantur a Deo:

et qui te volunt diligere, non defraudentur a fide.

Gloria Patri, etc.

CXXVI

Nisi, Domina, aedificaveris domum cordis nostri:

non permanebit aedificium ejus.

Aedifica nos gratia et virtute tua:

ut maneamus firmi in perpetuum.

Benedictum sit eloquum tuum:

et benedicta sint omnia verba oris tui.

Benedicantur a Deo, qui te benedicunt:

et in iustorum numero computentur.

Benedic, Domina, te benedicentes:

et ne unquam avertas ab eis gratiosum vultum tuum.

Gloria Patri, etc.

CXXVII

Beati omnes, qui timent Dominam nostram:

et beati omnes, qui sciunt facere voluntatem tuam, et beneplacitum tuum.

Benedicti sunt pater et mater qui te genuerunt:

quorum memoria permanet in saeculum.

Benedictus est venter, qui te portavit:

et benedicta sint ubera, quae te lactaverunt.

Converte misericordiam tuam super nos:

et deprecabilis esto super servos tuos.

Intùere, et réspice opprobrium nostrum:

aufer a nobis cunctas iniquitates nostras.

Gloria Patri, etc.

CXXVIII

Saepe expugnaverunt me a iuventute mea inimici mei:

libera me, Domina, et vindica me ab ipsis.

Ne des illis potestatem in animam meam:

custodi omnia interiora, et exteriora mea.

Obtine nobis veniam peccatorum:

per te Spiritus sancti gratia nobis detur.

Fac nos digne et laudabiliter poenitére:

ut beato fine ad Deum veniamus.

Placatum tunc et serenissimum nobis ostende:

gloriosum fructum ventris tui. Gloria Patri, etc.

CXXIX

De profundis clamavi ad te, Domina:

Domina, exaudi vocem meam.

Fiant aures tuae intendentes:

in vocem laudis et glorificationis tuae.

Libera me de manu adversariorum meorum:

confunde ingenia et conatus eorum contra me.

Erue me in die mala:

et in die mortis ne obliviscaris animae meae.

Deduc me ad portum salutis:

inter justos scribatur nomen meum. Gloria Patri, etc.

CXXX

Domina, non est exaltatum cor meum:

neque sublimati sunt oculi mei.

Benedixit te Dominus in virtute sua:

qui per te ad nihilum redegit inimicos nostros.

Benedictus sit, qui te sanctificavit:

et mundam de matris utero te produxit.

Benedictus sit, qui te obumbravit:

et sua gratia te foecundavit.

Benedic nos, Domina, et conforta nos in gratia tua:

ut per te ante conspectum Domini praesentemur.

Gloria Patri, etc.

CXXXI

Memento, Domina, David:

et omnium invocantium nomen tuum.

Da nobis in nomine tuo fiduciam:

et confundantur adversarii nostri.

Consolare nos in terra peregrinationis nostrae:

et releva paupertatem nostram.

Da nobis panem lacrymarum, Virgo sancta:

et dolorem peccatorum in terra incolatus nostri.

Redde nobis propitium benedictum fructum ventris tui:

ut Spiritus sancti gratia repleamur. Gloria Patri, etc.

CXXXII

Ecce quam bonum, et quam iucundum, Maria:

diligere nomen tuum.

Unguentum effusum, et aromaticum est nomen tuum:

diligentibus ipsum.

Quoniam magna multitudo dulcedinis tuae, Domina:

quam praeparasti diligentibus et sperantibus in te.

Esto refugium pauperum in tribulatione:

quia tu est baculus pauperum et miserorum.

Inveniat, quaeso, gratiam apud Deum:

qui te in suis necessitatibus invocabunt.

Gloria Patri, etc.

CXXXIII

Ecce nunc benedicite Dominam:

omnes qui speratis in nomine sancto eius.

Gaudete gaudio magno, qui exaltatis et glorificatis eam:

quia laetabimini ab ubertate consolationis eius.

Ecce nunc inundante ubertate declinabit in vos:

ad consolandum et laetificandum corda vestra.

Benedicite illam, omnes servi ejus:

et memoriale sit in desiderio animae vestrae.

Benedicite illam, omnes angeli et sancti Dei:

laudate in saecula mirabilia ejus. Gloria Patri, etc.

CXXXIV

Laudate nomen Domini:

benedicite nomen Mariae matris eius.

Mariae precamina frequentate:

et suscitabit vobis voluptates sempiternas.

In animo contrito veniamus ad illam:

et non stimulabit nos cupiditas peccati.

Qui cogitat de illa in tranquillitate mentis:

inveniet dulcorem et requiem pacis.

Respiremus ad illam in finitione nostra:

et reserabit nobis atria triumphantium.

Gloria Patri, etc.

CXXXV

Confitemini Domino, quoniam bonus est:

quoniam per suam dulcissimam matrem Virginem Mariam 

datur misericordia eius.

Impetra nobis, Domina, amicitiam Iesu Christi :

et custodi nos, ne perdamus innocentiam nostram.

Còmprime hostem nostrum imperio tuo:

ne feriat  in nobis virtutem charitatis.

Bona naturalia conserva in nobis:

et bona gratiae per te multiplicentur.

Illumina vias et semitas nostras:

ut noscamus quae beneplacita sunt Deo.

Gloria Patri, etc.

* * * * * * * *

CXXXVI

Super flumina Babylonis fleverunt Hebraei:

nos vero super iniquitates nostras lugeamus.

Clamemus humiles ad puerperam Virginem:

offeramus ei planctus et suspiria nostra.

Non invenitur propitatio sine illa:

nec salus sine fructu illius.

Per illam peccata purgantur:

et per fructum illius, animae dealbantur.

Per illam fit satisfactio peccatis:

per fructum illius, sanitas condonatur. Gloria Patri, etc.

CXXXVII

Confitebor tibi, Domina, in toto corde meo:

quia per te expertus sum clementiam Iesu Christi.

Audi, Domina, verba mea et preces meas:

et in conspectu angelorum cantabo tibi laudes.

In quacumque die invocavero te, exaudi me:

et multiplica virtutem in anima mea.

Confiteantur tibi omnes tribus et linguae:

quia per te salus restituta est nobis.

Ab omni perturbatione libera servos tuos:

et fac eos vivere sub pace et protectione tua.

Gloria Patri, etc.

CXXXVIII

Domina, probasti me, et cognovisti me:

ruinam et transgressionem meam.

Copiosa facta est super me misericordia tua:

et dilatata est super me clementia.

Imperfectum meum aspexit oculus tuus:

et palpebrae tuae noverunt vias meas.

Affluentiam desiderii sancti habeamus a Spiritu sancto:

et macula peccati non turbet conscientiam nostram.

Serenet corda nostra lux misericordiae tuae:

et recreet nos tuae pacis dulcedo. Gloria Patri, etc.

CXXXIX

Eripe me, Domina, ab omni malo:

et ab hoste infernali defende me.

Contra me tetendit arcum suum:

et in fraude sua insidiatur mihi.

Constringe vires eius malignas:

et obtunde potenter astutias eius.

Converte iniquitatem ipsius in verticem illius:

et in foveam quam fecit, cadat festinanter.

Nos autem exultemus in servitio tuo:

et in tuis laudibus gloriemur. Gloria Patri, etc.

CXL

Domina, clamavi ad te, exaudi me:

intende orationi meae et postulationi meae.

Dirigatur obsecratio mea velut incensum coram facie tua:

et in tempore serotini sacrificii, et matutini.

Non declinet cor meum in verbis malignantibus:

et nequitiae cogitatus non subvertant sensum meum.

Fac me assentire beneplacito cordis tui:

et tuis actionibus conformari.

Gladio intelligentiae reverbera cor meum:

et igniculo charitatis inflamma mentem meam.

Gloria Patri, etc.

CXLI

Voce mea ad Dominam clamavi:

ipsamque humiliter deprecatus sum.

Effudi in conspectu ejus lacrymam meam:

et dolorem meum sibi exposui.

Insidiatur hostis calcaneo meo:

extendet contra me rete suum.

Adiuva me, Domina, ne corruam coram eo:

fac ut conteratur sub pedibus meis.

Educ de carcere animam meam:

ut confiteatur tibi, et psallat Deo forti in perpetuum.

Gloria Patri, etc.

CXLII

Domina, exaudi orationem meam:

percipe tuis auribus suplicationem meam.

Persecutus est malignus vitam meam:

deposuit in terra conversationem meam.

Denigravit me calgine sua:

et anxiatus est nimis spiritus meus.

Ne avertas faciem tuam a me:

ut non corruam cum descendentibus in lacum.

Emitte lucem tuam, et gratiam tuam:

et repara denuo vitam meam, et conscientiam meam.

Gloria Patri, etc.

CXLIII

Benedicta sis, Domina, quae instruis servos tuos ad praelium:

et eos roboras contra inimicum.

Fulgure et coruscatione dissipa illum:

mitte jacula tua, ut confundas illum.

Clarifica de alto manum tuam:

et cantent servi tui laudem et gloriam tuam.

Eleva de terrenis affectionem nostram:

de sempiternis deliciis refice viscera nostra.

Concupiscentiam supernorum accende in cordibus nostris:

et de gaudiis paradisi velis nos recreare.

Gloria Patri, etc.

CXLIV

Exaltabo te, Mater Filii Dei:

et per singulos dies cantabo laudes tuas.

Generationes et populi laudabunt opera tua:

et misericordiam tuam insulae expectabunt.

Abundantiam dulcoris tui angeli eructabunt:

et suavitatem tuam sancti pronuntiabunt.

Oculi nostri sperant in te, Domina:

mitte nobis cibum et escam delectantem.

Laudationem tuam loquatur lingua mea:

et benedicam te in saeculum saeculi. Gloria Patri, etc.

CXLV

Lauda, anima mea, Dominam:

glorificabo eam, quamdiu vixero.

Nolite cessare a laudibus eius:

et per singula momenta recogitate illam.

Cum exierit spiritus meus, Domina, sit tibi commendatus:

et in terra ignota praesta illi ducatum.

Non conturbent eum culpae prius commissae:

nec iquietent ipsum occursus malignantis.

Perduc eum ad portum salutarem:

ibi praestoletur secure adventum Redemptoris.

Gloria Patri, etc.

CXLVI

Laudate Dominam, quoniam bonus est psalmus:

jucunda, et decora sit illi nostra laudatio.

Ipsa enim medetur contritis corde:

et refovet eos unguento pietatis.

Magna est virtus illius:

et clementia eius nullum habebit finem.

Praecinite ei in jubilatione:

et in confessione psalmum canite illi.

Beneplacitum est ei super timentes Deum:

et in eis qui sperant in misericordia eius.

Gloria Patri, etc.

CXLVII

Lauda, Hierusalem, Dominam:

glorifica illam etiam, o Sion.

Ipsa enim construit muros tuos:

et filios tuos benedicit.

Gratia sua te impinguat:

pacemque donat terminis tuis.

Emisit Verbum suum Altissimus:

et virtus eius obumbravit illi.

Levemus corda nostra cum manibus ad illam:

ut suam influentiam sentiamus. Gloria Patri, etc.

CXLVIII

Laudate Dominam nostram de coelis:

glorificate eam in excelsis.

Laudate eam, omnes homines et jumenta:

volucres coeli, et pisces maris.

Laudate eam, Sol et Luna:

Stellae, et circuli Planetarum.

Laudate eam, Cherubim et Seraphim:

Throni et Dominationes, et Potestates.

Laudate eam, omnes legiones Angelorum:

laudate eam, omnes ordines spirituum supernorum.

Gloria Patri, etc.

CXLIX

Cantate Dominae nostrae canticum novum:

laus eius in congregatione justorum.

Laetentur coeli de gloria ejus:

insulae maris, et totus orbis.

Aqua et ignis laudent eam:

frigus et aestus, splendor et lumen.

Exaltationes ejus in gutture justorum:

et laudes ejus in coetu triumphantium.

Civitas Dei, jucundare in illa:

et pro incolis tuis frequenta illi carmen. Gloria Patri, etc.

CL.

Laudate Dominam in sanctis ejus:

laudate eam in virtutibus et miraculis eius.

Laudate eam, coetus Apostolorum:

laudate eam, chori Patriarcharum et Prophetarum.

Laudate eam, exercitus Martyrum:

laudate eam, turmae Doctorum et Confessorum.

Laudate eam in collegio Virginum et Continentium:

laudate eam ordines Anachoretarum et Monachorum.

Laudate eam, conventus Religiosorum omnium:

laudate eam, omnes animae civium supernorum.

Gloria Patri, etc.

Omnis spiritus : 

laudet Dominam nostram.

Gloria Patri, etc.

CANTICUM

Sancti Bonaventurae ad Beatam Virginem

Te Matrem Dei laudamus : * te Mariam Virginem profitemur.

Te Æterni Patris Sponsam * omnis terra veneratur.

Tibi omnes Angeli, et Archangeli: 

 *tibi Throni, et Principatus fideliter deserviunt.

Tibi omnes Potestates, et omnes Virtutes Cælorum: 

* et universæ Dominationes obediunt.

Tibi omnes Chori : * tibi Cherubim, 

et Seraphim exultantes assistunt.

Tibi omnes Angelicæ creaturæ: * incessabili voce proclamant.

Sancta, Sancta, Sancta Maria: * Dei Genitrix, Mater, et Virgo.

Pleni sunt Cœli, et terra: * majestatis gloriæ fructus ventris tui.

Te gloriosus Apostolorum Chorus: * sui Créatoris Matrem collaudat.

Te Beatorum Martyrum cœtus candidatus: * Christi Genitricem glorificat.

Te gloriosus Confessorum exercitus: * Trinitatis Templum appellat.

Te Sanctarum Virginum chorea amabilis: * virginitatis, et humilitatis exemplum prædicat.

Te tota Cœlestis Curia: * Reginam honorat.

Te per universum Orbem: * Ecclesia invocando concelebrat.

Matrem: * Divinæ Majestatis.

Venerandam te veram Regis Cœlestis puerperam:  

*  sanctam quoque, dulcem, et piam.

Tu Angelorum Domina: * tu Paradisi janua.

Tu scala Regni Cœlestis: * et Gloriæ.

Tu Thalamus: * tu arca pietatis et gratiæ.

Tu vena misericordiæ: * tu Sponsa, et Mater Regis æterni.

Tu Templum, et Sacrarium Spiritus Sancti:  * totius Beatissimæ Trinitatis nobile triclinium.

Tu Mediatrix Dei, et hominum :  *amatrix mortalium, Cœlestis illuminatrix.

Tu agonizatrix pugnantium, advocata pauperum: * miseratrix, et refugium peccatorum.

Tu erogatrix munerum: * separatrix, ac terror dæmonum, et superborum.

Tu mundi Domina, Cœli Regina: *  sola spes nostra.

Tu salus te invocantium, portus naufragantium: 

* miserorum solatium, pereuntium refugium.

Tu Mater omnium beatorum, gaudium plenum: 

* omnium supernorum Civium solatium.

Tu promotrix justorum, congregatrix errantium :  

* promissio Patriarcharum.

Tu veritas Prophetarum, præconium, et doctrix Apostolorum:  

* Magistra Evangelistarum.

Tu fortitudo Martyrum, exemplar Confessorum:  

* honor, et festivitas Virginum.

Tu ad liberandum exulem hominem:  

* Filium Dei suscepisti in uterum.

Per te, expugnato hoste antiquo,  

* sunt aperta fidelibus Regna Cœlorum.

Tu cum Filio tuo: * sedes ad dexteram Patris.      

Tu ipsum pro nobis roga, Virgo Maria:  * quem nos ad judicandum credimus esse venturum.

Te ergo poscimus, nobis tuis famulis subveni:  

* qui pretioso sanguine Filii tui redempti sumus.

Æterna fac, pia Virgo Maria:  

* cum Sanctis tuis nos in gloria numerari.

Salvum fac populum tuum, Domina:  

* ut simus participes hæreditatis Filii tui.

Et rege nos: * et custodi nos in æternum.

Per singulos dies:  * o Domina Maria, te salutamus.

Et laudare te cupimus:  * usque in æternum mente, et voce.

Dignare, dulcis Maria, nunc, et semper:  

* nos sine delicto conservare.

Miserere pia nobis: * miserere nobis.

Fiat misericordia tua magna nobiscum : *quia in te Virgo Maria confidimus.

In te, dulcis Maria, speramus   * nos defendas in æternum.

Te decet laus, te decet imperium: * tibi virtus et gloria in sæcula sæculorum. 

Amen.

****
«Mitto vobis ipsius Virginis sacratissimae Psalterium ex scintillula meae pauculae intelligentiae, gratia illius conditum et compactum»

Sanctus Bonaventura 

Divina Immaculata Virgo Marìa

sis mecum semper

et omnia quae fàciam

pròtege et sanctìfica. Amen

Magnificat

"Magníficat * Anima mea Dóminum,

et exsultávit spíritus meus * in Deo salvatóre meo,

quia respéxit humilitátem ancíllæ suæ. * Ecce enim ex hoc beátam me dicent omnes generatiónes,

quia fecit mihi magna, qui potens est, * et sanctum nomen eius,

et misericórdia eius in progénies et progénies * timéntibus eum.

Fecit poténtiam in bráchio suo, * dispérsit supérbos mente cordis sui;

depósuit poténtes de sede * et exaltávit húmiles;
esuriéntes implévit bonis * et dívites dimísit inánes.

Suscépit Israel púerum suum, * recordátus misericórdiæ, sicut locútus est ad patres nostros, * Abraham et sémini eius in sæcula.

Glória Patri, et Fílio * et Spirítui Sancto.
Sicut erat in princípio, et nunc et semper, * et in sǽcula sæculórum. 
Amen."
(Indulgenza parziale E.I. n.32)

O Sacerdos, quis es tu? 

Quando il Diacono Joseph Ratzinger divenne Sacerdote

Haec meditare: 1 Tim 4,15:

Dignità del Sacerdote: Sacerdos alter Christus: S.I.Crys. - Admiramini, gaudete: Christus facti sumus!: S.Aug.- Miraculum stupendum, magna, immensa, infinita, sacerdotis dignitas: coelum attingit, cum Angelis conversatur, cum Deo familiariter agit: S.Ephr.- Sacerdos, terrenus Deus, ad animas deificandas destinatus: S.Greg.Naz. Apol.1.- "Se incontrassi un Angelo e un Sacerdote saluterei il Sacerdote prima dell'Angelo": S. Francesco d'Assisi.

Santità del Sacerdote: Sancti estote, quia ego sanctus sum: Lev.11,44-45.- Estote perfecti, sicut et Pater vester coelestis perfectus est: Mt 5,48. - In omni conversatione sancti sitis:1Pt 1,16.- Voluntas Dei sanctificatio vestra:1Thes.4,3.- Tu, o homo Dei, sectare justitiam, pietatem, fidem, caritatem, patientiam, mansuetudinem:1Tim.6,11.- Professio Clericorum vita coelestis. - Sanctitas una nos efficit quales vocatio divina exposcit: homines videlicet mundo crucifixos et quibus mundus ipse sit crucifixus: S. Pius X.

Vita di imitazione e unione con Gesù e Maria: Manete in Me: et ego in vobis: Ioan 15,4. Manete in dilectione mea: Ioan 15,9.- Si quis in Me non manserit mittetur foras... et arescet: Ioan 15,6 - Si quis Spiritum Christi non habet, hic non est eius: Rom.8,6.- Quicumque baptizati estis Christum induistis: Gal 3,27.- Hoc sentite in vobis quod et in Christo Iesu: Philip.2,5.- Christus... vita vestra: Colos 3,4.- Summum igitur studium nostrum sit in vita Iesu Christi meditari: Im. Chr.l.1.c.1.- Memor esto arrepti propositi e imaginem tibi propone Crucifixi... Qui se intente et devote in sanctissima vita et passione Domini exercet, omnia utilia et necessaria sibi abundanter inveniet: nec opus estut extra Iesum aliquid melius quaerat. O si Iesus Chrucifixus in cor nostrum veniret!: Im.Chr.l.1,c. 25.- "Quodcumque dixerit vobis, facite": Ioan 2,5- "Ecce ancilla Domini. Fiat mihi secundum verbum tuum": Luc 1,38.- "Magnificat...": Luc 1,46.

Spirito di orazione: Oportet semper orare et non deficere: Luc 18,1.- Horrendum est diem sine oratione transigere.- Servemus cor sursum ne putrescat in terra. Vere novit vivere qui recte novit orare: S. Aug.- Haec duo sunt sacerdotis opera: ut aut a Deo discat, legendo Scripturas divinas et saepius meditando: aut populum doceat quae ipse a Deo didicerit non ex proprio corde vel humano sensu: Orig. - Aliorum est servire Deo: nostrum est adhaerere: S.I.Chrys.- Cadentem genam pagina sancta suscipiat: S.Hier.- Attende studiose, rite, pie, religiose divinas laudes celebrare: non mente vaga, non vagis oculis, non indecenti corporis statu: Conc.Mediol. IV.- Nihil aliud dum psallitis, quam quod psallitis cogitate: S.Bonav.

Apostolato, frutto di vita interiore: Ego elegi vos, et posui vos ut eatis, et fructum afferatis: Ioan 15,16.- Qui manet in Me et ego in eo, hic fert fructum multum: quia sine Me nihil potestis facere: Ioan 15,5.- Quanta luce in quella parabola della vite e dei tralci!... I miei sforzi da soli non valgono nulla, assolutamente nulla: ma saranno utili e benedetti da Dio unicamente se, per mezzo d'una vera vita interiore, io li unisco costantemente all'azione vivificante di Gesù: Chautard.- "Omnia possum in Eo qui me confortat": Phil 4.13.

Buon esempio: Vos estis sal terrae... vos estis lux mundi... luceat lux vestra coram hominibus: et videant opera vestra bona et glorificent patrem vestrum: Matth 5,13-16. - Quidquid feceris, id sibi omnes faciendum putant: S.Hier. ad Eliod.- Non solum corrigetis orbem sancte recteque vivendo; sed etiam glorificare Deum ex vestra conversatione facietis: quemadmodum si contraria gesseritis, et homines perdetis, et nomen Dei blashemiis offendetis: S.I.Crys.- Cum pastor per abrupta graditur, consequens est ut grex in praecipitio feratur: S.Greg.M.-  Mores loquentis cogunt, non verba: Menander.- Non temere dico, sed ut affectus sum et sentio: non arbitror, inter sacerdotes, multos esse qui salvi fiant, sed multo plures qui pereant: quia quod alii peccant sacerdoti imputatur: S.I.Crys.- Omni cui multum datum est, multum quaeretur ab eo: Luc 12,48.

*

Vita boni sacerdotis crux est et dux paradisi. Incoeptum est: retro abire non licet, nec oportet. Eia, fratres, pergamus simul: Iesus erit nobiscum. Propter Iesum suscepimus hanc crucem, propter Iesum perseveremus in cruce. Erit adiutor noster, qui est dux noster et praecessor: Im.Chr. l 3, c.56.- Doce me, Domine, terrena despicere, praesentia fastidire, aeterna quaerere, coelestia sapere, honores fugere, scandala sufferre, omnem spem in te ponere, extra te nihil cupere, et super omnia Te ardenter amare. Ibid.c.44.

*

O Sacerdos, quis es tu? Non es a te, quia de nihilo; non es ad te, quia mediator ad Deum; non es tibi, quia sponsus Ecclesiae; non es tui, quia servus omnium; non es tu, quia Deus es. Quid ergo es? Nihil et omnia. O Sacerdos!

<< Mamma Celeste guariscimi nel corpo e nell’anima >>

AMDG et DVM

AVE MARIA PURISSIMA!